الاثنين، 15 مارس 2010

هم يضحك وهم يبكى...يوميات شاعر فى أجازه



وحشتونى وحشتنونى وحشتونى...بقالى كتير مش متابعكم ولا برد على تعليقاتكم بس الحمد لله أخدت اجازه وسمعت كلام عمرو أديب ( وروحت) على نفسى وروحت لبيت العيله!! الحمد لله وصلت بالسلامه الواد كريم بهدلنى فى الطريق واخد برد على ما وصلت من الغردقه لميت غمر.. المهم الحاله الى كنت فيها الحمد لله روحت (ههههه) وكنت قاعد إمبارح بليل مع العيله وكان كلامنا كله على الواد علاء اخويا ( صاحب مدونه عجبى) الى اتنشر له قصيده فى الكتاب بتاع مهرجان النشر الجماعى وقعدوا يفكرونى بقصايدى الى كنت بكتبها فى الى بيدايقونى وحبيت افتكر شويه منهم هنا يمكن تضحكوا زينا...وياريت ما توحشونيش كده تانى


قصيدة الموظف المثالى
كتبت فى 20 يناير 2009 بعد إختيارى الموظف المثالى بفرع الغردقه لعام 2008


من بعد طـــــــــول إنتظار
وحلم طــــــــــول الليالى
وقـــــــــــع عليه الإختيار
وأكـــــــون موظف مثالى
إسمى فى لوحـــة الشرف
رجع من تـــــــانى يلالى
سنة بكل مــــــــــــا فيها
طلعت فيهــــــــــا العالى
وبين منـــــــاديب الفرع
قالـــــــــولى إنته الغالى
وشهـــــــــــــاده للتقدير
يافـــــــــــرحتى يا أمالى
وكمــــــان مكافأة كبيره
تظبط جميــــــع أحوالى
وعشت ع الحلـــــــم ده
أرسم وأعيش فخيـــالى
إنـــــــــــى صبحت أمير
أو حتى سعد الدالـــــــى
وتــــــــانى يوم الصبح
أبوجــــــابر قام وندانى
قــــــــالى المكافأه جت
إفتح وريح بـــــــــــالى
أخدت منتــــــه الظرف
وخــــــرجت بره لحالى
أدارى علـــــى شمعتى
يمكن تقيد طــــــــوالى
ألاقيها 250 لحلوح
وياعينى على جرالى
وأصحــابى من فزعتى
ســــــألونى إيه مالى؟
صــــرخت من قهرتى
أغنى مـــــــــــــوالى
وعــــــــدتنى بالحلق
خـــــــرمت انا ودانى
ونصيبى لمــا أتخلق
للفقــــــــــــر ودانى
والبحــــــر لو ينفلق
هحلف وقــــــول تانى
فقرى..وفقرى نصيب
وزمــــــــــانى قلهالى



المتابعون