هو القبض نزل فى المكنة ولا لسه؟

غدا أول الشهر وما أدراك ما أول الشهر... أسعد يوم فى حياة ناس كتير ومن ضمنهم العبد لله...اليوم الوحيد الى بتحس فيه انك غنى... والغنى هنا مش الغنى الى بالكوا فيه بس الاحساس انك معاك فلوس ... بس النهارده عشان الشهر 31 يوم الكل بيسأل القبض نزل فى المكنه ولا لسه قصدهم بطاقه الصراف الألى كل فرد فى شركتنا الموقره بيسألنى !! الى فى اجازه والى فى رحله عشان انا الوحيد القريب من بنك الCIB مش عاوز اقول كام مكالمه لدرجه انى حسيت بمسئوليه تجاه الناس دى وقلت ايه الى ممكن يحصل لو المرتبات اتأخرت عشر أيام..أنا واحد من الناس هتسوح جمعيات لسه بسد فيها ( من ساعه ما اتجوزت) من سنه وشهر وغيرى كتير ..طب غير كده مصاريف البيت وأيجار الشقه ...إلخ

شوفتوا قد إيه أول الشهر فرحه ما بعدها فرحه، بس يافرحه ماتمت نيجى لاول مساوء طلعه الشهر

1. 
   
   البدايه انك تبعت الفلوس لأهلك وخصوصا هنا فى الغردقه كله مغترب وبيبعت ولا طابور العيش


2. 
   
   لا قدر الله لو كنت مستلف من شغلك على مايجى اول الشهر المحاسب يشوف خلقتك ويقولك منور


3. 
   
   تروح البيت تعبان تلاقى صاحب البيت بيقولك قبضت ولا لسه يا أستاذ اصلى هطلع بدور لعساف ( ابن صاحب البيت)وبعد ما يقفش الفلوس مفيش، بليل تروح تشترى من عنده ( سوبر ماركت) يقولك وصل النور جه!!


4. 
   
   تطلع تنام ومفيش فى جيبك إلا الى يمشيك لحد يوم 15 عشرين فى الشهر بالعافيه يمكن عشان رمضان يزق معاك كمان يوم ولا أتنين عشان كده انا بحب رمضان


5. 
   
   تنام وتحط راسك على المخده مراتك تتصل بيك ( مستنى الأتصال ده النهارده بليل) هو القبض كام ( قال إيه ماتعرفش) طب مفيش حاجه عشان العيد!! المهم تقولها على الحقيقه تقولك خلاص خلى معاك كذه اصلى عرفاك الفلوس بتقرصك وابعتلى الباقى عشان احتمال نشترى هدوم لكريم ( لسه مجبش شهرين وعنده لبس الدنيا مالبسوش) وطبعا لازم تقول حاضر عشان تلخص فى الدور اولا وعشان الموبايل الى فاتورته بتقطم الوسط من مكالماتها الكتير


6. 
   
   اروح انام وكل الى فبالى فرحت قدام الصراف الألى شويه ونمت وجيوبى مفضيه

وكما قال ياسر قطامش معارضا أمرىء القيس مع بعض التعديل من العبد لله

قفـــــــــا نبك من ذكر الغلاء المشعللى
فلســــــــــــت أراه عن قريب سينجلى
بدكـــان أبو عساف أرى كل حاجتى
ولكن بأسعــــــــــــــــــار تفوق تخيلى
أمــــر عليه كــــــــــــــــــل يوم وليلة
ولمــــــــــا يجدنى قادما كم يبص لى
يقول تعالى الأن يا بهاء كـــــى ترى
زبيبا وجـــــــوز الهند بيضاء فللى
وعندى من التمــــــــر اللذيذ ذكائب
وتين مـــــن دمشــــــــق وموصلى
ومـــــــــــازال يغرينى بكل طريقة
حتى قلت له رحماك يابن القرندلى
******
ياصاحبى لا تشته الياميشا
يكفيك أن الخبز ليس دشيشا
الجوز واللوز اللذيذ لغيرنا
فأحمد إلهك إن أكلت قريشا
وأحزر من الحاتى تمر أمامه
بدل الكباب ستأكل التلطيشا
لاحق عندك أن تشم أريجه
قد يندهون لمثلك الشاويشا
*****
فـقـلـــت إشمــــــــــــــعنى أنـــا
أتحمـــــــــــــــــل الفقر والضنا
بينمــــــــــــــا على سبيل المثال
أرى صــــــــــــديقى عبدالعال
الـــــــــــذى خاب فى المدرسه
قــــــــــــــد كون ثروة كويسه
ولأنــــــــه فى كل شىء سالك
إستطـــــاع أن يجمع الأساتك
وكأنمـــــا كتب الهم والشقاء
على المـــــــــــــدعوا بهاء
*****
إن كـــان يجمع بالأساتك خزنة
وترى مـــــرتبك الهزيل قروشا
فربأ بنفسك أن يغـــــــرك جاهل
يقتات تبنا أو يلــــــــوك حشيشا
وأكتب كما شئت القصيد روائعا
وتغن وأبن من الخيال عروشا
يــــامن تحب من الحياة فلوسها
إنى لأبصــــر كل ذاك فشوشا



ورمضان كريم وبينا رحيم