بعد التعديلات على قانون المرور والمغالاه فى المخالفات والتى وصل نص الحد الأدنى منها للسرعه 150 جنيه وألف وواحد جنيه للسير العكسى والحبس زادت كميه الرشاوى والصورة بتتكلم وشفت ده بعينى مع سواق الشركه الى بشتغل فيها لما لمح الواد بتاع الرادار فنزل وغمزه خمسين جنيه وعدى على الكمين زى الباشا للأسف!!! مش عارف اقولكوا إيه
بس الى عنده حاجة يقولهالى سلام
مد إيـــــــــدك خــدها منى
ولا مكســــوف منى يعنى
يــا عم فتح شوف حياتك
إنبسط وأفــــــرح وغنى
****
ماتقولش الناس بعيونها شــايفه
طب نعمل إيه فى جواز وخلفه
يـــا سيدى خدها ومشى حالك
بس انتــــــــه سيبك م المخالفه
****
هيفيد بإيه كم وصل كاتبه
لو تنام من غير عشا
لو إلى فوقك حد حاسبه
يبقى ليك حق الخشا
*******
أبو كريم
هناك 18 تعليقًا:
ههههههههههههه
هيفيد بإيه كم وصل كاتبه لو تنام من غير عشا
هي الدنيا باظت من شوية
قلة الضمير بتظبط كل حاجة
مش كدا ولا ايه
حاجة توجع وتحزن بجد
لغاية امتى هنفضل كده
دى لعبه وهتفضل شغاله
مش عارفة امتى هيقولوا
جيم اوفر
!!!!
هههههههههههههه
هى دى مصر
مش تتعب نفسك
شعبها هيفض ضميرة ضايع
امته بقا يفوق
مودتى
ده الحكاية دى من زمان تغمز الشاويش باى حاجة ويقطع الوصل ويقولك متشكريين ياباشا
ويوسعلك السكة كمان
قشطةةةةةةةةةةة يا ابو خطيبى
منورنا والله بكلماتك
ماما أموله
صح والله يا ماما أموله هى الدنيا باظت من شويه الغالبيه العظمى باعت ضميرها عشان كده مش قايم لنا قومه وهنفضل نعيش على الغير معاكى مية فالميه
منورانى
موناليزا
إزيك وأسف على سوء الفهم فى البوست إلى فات كان لازم أكتب التوضيح من الأول
بجد حاجه توجع وتحزن صحيح ربنا ما يكتب علينا الإستمرار فى بيع الضمير ده ونفوق بقى
شرفتينى ونورتى التعليقات
كيكى عووو
مستنى زيك والله الجيم أوفر وده مش هيحصل إلا لو رجعنا لضمايرنا وصحيناها من سباتها العميق
منورانى دائما
أنوش الغاليه
أخبارك إيه يا قمر..مش حاجة تكسف اننا نكون كده واحنا بلد مسلم..يارب نفوق ونصحى ونرجع لدينا بقى عشان حالنا يتظبط
دايما منورانى
مى ( خطيبة كوكو) منورة التعليقات
بصى يا ست الكل الشاويش بقى كده لانه ملقاش حد يحاسبه وكذلك ظابط المرور وده كله لانه المرتبات الى بيقبضوها ماتتناسبش مع المعيشة الغاليه الى احنا عايشنها اليومين دول وده مش مبرر بس بياخدوها حجه
سلام يا جميل
المشكلة واقعية واستشرت فى كل مناحي الحياة
واخذت اشكال كثيرة متعددة ولم تبقي فى الخفاء كما فى السابق
قدرتك على التعبير بالكلمات رائعة
تحياتي
حاول تفتكرنى
أهلا بيكى دايما
المشكله ان الكل شايف ومفيش حاجه بتتغير ومتشكر جدا على الكلام الجميل ده
دمت للمدونه زائره
كل يوم للاسف بنشوف الموقف دا
و كأنهم عملوا قانون المرور
عشان كده
self meaning
ماهى دى المصيبة القانون يطلع يطبق حاجه فى المقابل يفشى حاجه تانيه تهد القانةن من جزوره مش عارف العيب منين
نورتينى
والله العظيم كل يوم بشوف ده بعيني وانا رايحة شغلي وانا رجاعة كمان
تلاقي السواق يقول للتباع ارميله يابني حاجة خلينا نخلص منه
وعلى ده الحال علطول ودايما
احنا بقينا دولة رشاوي
مش في ده بس يا ابو كريم
في كل شيء في حياتنا
كل حاجة بقت بالرشاوي
حتى لما تيجي تدخل ابنك المدرسة وهو صغير شوية عن السن القانوني لازم تدفع رشوى
عايز تبني في ارض زراعية وده ممنوع لازم تدفع رشوى
عايز تخلص اي ورقة بسرعة لازم تدفع رشوى
عايز تشتغل لازم تدفع رشوى
حياتنا كلها بقت كدة وده اللي بوظ
البلد
تحياتي واسفي على ما نحن فيه
زهور الأمل
لك كل الحق فى الأسف على ما نحن فيه وانا ايضا اشعر بالأسف والخجل ووخز الضمير لانى أرى هذا بعينى ولا استطيع ان أحرك ساكنا مثلى كغيرى وهنا تكمن المصيبه
اللهم أرحمنا فأنت بنا راحم ولا تعذبنا فأنت علينا قادر
نورتينى
بجد بجد مش قادره أقولك قد ايه دمى بيتحرق لما بشوف المواقف دى .
ببقى عايزه أقطع ايديهم هما الاتنين :@
حسبى الله ونعم الوكيل
butterfly
ياريت إيديهم تتقطع ولا يعملوا كده لان دى من الحاجات إلا مبوظه المجتمع بتاعنا بجد والناس فكراها خدمه انه يرتشى وفهلوه انه يرشى اى حد ويعدى
تحياتى
إرسال تعليق