إستحملونى

الخنقه الى الواحد فيها اليوميين دول مش نافع معاها أى جرعة تفاؤل ولا أى بصيص أمل

الشغل مبقاش زى الأول ولا الدخل برده والمتطلبات عماله تزيد، والحكومه النظيفيه نضفت كل ما تبقى من مدخرات لدينا والغالى غلى علينا أحلامنا، والتلفزيون أه من التليفزيون وأعلاناته الى بتكسبك عربيات وألاف الجنيهات بمجرد رنات وبرامج التوك شو إلى مفيش بديل عنها إلا قناة موجه كوميدى، وزى ما الصورة الى تحت دى بتقول... هنضحك يا حكومة ومش هنوريكى دمعتنا وإنشاله تقوم قيامتنا

قال شاعر حلمنتيشى لا أعرفه معارضا شوقى

............

سلوا قلبى وقولوا لى الجوابا…لماذا حالنا أضحى هبابا؟

لقد زاد الفساد وساد فينا…فلم ينفع بوليسٌ أو نيابة

وشاع الجهل حتى ان بعضاً…من العلماء لم يفتح كتابا

وكنا خير خلق الله صرنا…فى ديل القايمة وف غاية الخيابة

قفلنا الباب..أحبطنا الشبابا…فأدمن أو تطرف أو تغابى
أرى أحلامنا طارت سرابا…أرى جناتنا أضحت خرابا

وصرنا نعبد الدولار حتى…نقول له(إنت ماما وانت بابا)

وملياراتنا هربت سويسرا…ونشحت م الخواجات الديابة

ونُهدى مصر حباً..بالأغانى…فتملؤنا أغانينا اغترابا

وسيما الهلس ِ تشبعنا عذابا…وتشبعنا جرائدنا اكتئابا

زمان يطحن الناس الغلابة…ويحيا اللص محترماً مهابا

فكن لصاً اذن أو عش حمارا…وكل مشّاً اذن أو كل كبابا

ودس ع الناس أو تنداس حتى…تصير لنعل جزمتهم ترابا

أمير الشعر عفواً واعتذارا…لشعركَ فيه أجريت انقلابا

وما نيل المطالبِ بالطيابة…دى مش دنيا ياشوقى بيه… دى غابة