أيها المواطنون مجلس الأنس الكريم
فى بداية لإحتفال أشكر الأخ إبراهيم
النهاردة جبتكم للمناقشة فى الإطار
تسمعونى وأقولكم هكذا يبقى الحوار
بس قبل الإحتدام خلو بالكو وصحصحو
حد أثنـــــــاء الكلام يتنقل من مطرحوا
كل عام وأنتم بخير
النهاردة فى بلدنا أى واحد عنده حق
يبدى رأيه فأى حاجه إلا فالسياسة لاء
إحنا أه ديمقراطية بس فحدود الحدود
تيجى شله ماركسيه أو مزايد أو حقود
كل عام وأنتم بخير
فى كلام عن مشكلات هما مالهم بالبلد
حد جاع أو حد مات كل مولود إنولد
فى تفاوت فالمعايش أيوه، بس الحقد عيب
والمثل بيقول يا غايش كل هدمه وليها جيب
كل عام وأنتم بخير
أما شغل التنظيمات ولى دايرين يلطموا
يبعتولى وفد منهم ما إقتنعشى هفرموا
وإحنا بردك عيلة واحدة والرغيف هنقسموا
يجى واحد مش فاهملى يعنى ايه هنقسمه
كل عام وانتم بخير
فمشوا أحسن من سكات ع الحوار المستقيم
إحنا أصلا فلاحين نعرف العيب من قديم
وإحنا مجتمع سلام، والسلام يعنى السرور
والتسامح والزهور والتألف والعطور
والأغانى والمبانى والأمانى بالبخور
والمباهج فى القصور والقناعه فى الكفور
وإحترام الأغنياء زى شارات المرور
والكبير يفضل كبير مهما يغلط أو يجور
والصغير مش ضرورى إنه يكبر أو يثور
والجعان يبوس إيديه لو يبات من غير فطور
ليه؟ لأن الشكوه عيب والنجوم غير البذور
هكذا نبنى السلام والسرور ع الناس يدور
أيها المواطنون مجلس الأنس الكريم
فى نهايه لإحتفال بشكر الأخ إبراهيم
ليست هناك تعليقات:
إرسال تعليق